 |
Vegna takmarkaðs aðgangs að fínkornuðu steinefni á Íslandi, er algengt að auka sementsmagn til þess að mæta skorti á fínum steinefnum í steypu og múrblöndum.
Í sjálfútleggjandi steypu og fljótandi gólfílögnum þarf um og yfir 400 kg af fínefni/m³ (sement+fínkornuð steinefni), til þess að ná viðunandi vinnanleika steypunnar. Fyrir utan hátt fínefnamagn þarf vatnsmagnið að vera lágt, til þess að auka samloðun og forðast aðskilnað. Þetta allt hefur í för með sér lágt v/s-hlutfall, ef notað er eingöngu sement, og verður steypustyrkur og fjaðurstuðull mjög hár og steypan viðkvæm fyrir útþornun, með þar af leiðandi aukinni hættu á sprungum.
Til þess að ráða bót á ofangreindu er æskilegt að skipta hluta af sementinu út með fínkornuðu steinefni, eins og t.d. kalksteinsmélu eða svifösku.
Við framleiðslu á sjálfútleggjandi steypu er æskilegt að nota 15-35 % svifösku af bindiefnismagninu. Í fljótandi gólfílagnir er talið að 30-40 % svifaska sé æskileg í blönduna.
Virknisstuðull fyrir svifösku er 0,3 – 0,5, þ.e.a.s. að við útreikninga á v/s-tölu þarf að margfalda magn svifösku með 0,3 – 0,5 við útreikninga á jafngildu sementsmagni.
Auk augljósra kosta við notkun á svifösku í fínefnaríkum blöndum, er hægt að nota svifösku til lækkunar á hita í byggingarhlutum með stórum þversniðum, sem og til þess að bæta hæfni sementsrýrrar blöndu til dælinga.
|
|
